لولب ياباني - لعمنا الشاعر فؤاد حداد

لَوْلَب ياباني

كلامي عن أعظم مَعْرَض
بايت و صابح مستورد

أصل الحكايه و كان ياما كان
اليافطه في صدر الدكَّان
مكتوب عليها نَتحَدَّى
بحرف دال وعليه شَدَّه
أَكِنّ بحر من المهاويس
عمّي الأشارجي فتح له هاويس
راح الميدان مشفوط شفطه
و كلّه طاير ع اليافطه
و طرت أنا حركات بركات
و شفت في البترينه حاجات
منظرها وَحْدُه موسيقى
مقامها بمقام السيكا
أشكال و ألوان بتزغرد

كلامي عن أعظم مَعْرَض
بايت و صابح مستورد

الفن راح نُصه تجاره
و العين لازم لها نظاره
والكهل مش قادر يِسْلَى
أيام ما كان ياكل نِسْلَه
ومعلقه فضه و شوكه
و معلقه صيني و تُوكَه
و مرايه من جوه مرايه
حتى الباروكه بفَلاّيَه
فن التجاره صحيح يِخْيِل
خلَّى العجوزه تستعْيِل
خلّى المريضه تستمرض

كلامي عن أعظم مَعْرَض
بايت و صابح مستورد

يا دنيا مالك يا دنيا
يا دبابات جنب كولونيا
يا ألف صنف و تفنينه
آه يا اللي ريقنا يجرينا
يا محَوّدين ع الناحيه دي
يمكن رفوف البترينه
طياره تضرب أولادي
سَرَّحت قلبي على الوادي
و لبست من مصر نسيجها
وفُلَّها و بنفسجها
إنتاج بلادنا جميل جداً
و الديك جميل اللي بيدن
على الغيطان الوطنيه
من غير لوالب يابانيه
و انقر يا منقار زغلولي
جميزة الخاله سنيّه
انقر بِسنّه دهب لولي
وسنّه ضحكت بمجرد

كلامي عن أعظم مَعْرَض
بايت و صابح مستورد